Bizkaiko Foru Aldundia - Diputación Foral de Bizkaia

Situación de las mujeres sordas ante la violencia de género – Emakume gorren egoera, genero-indarkeriaren aurrean.

Pertsona Gorren Estatuko Konfederazioak (CNSE) duela gutxi Emakume gorren egoera, genero-indarkeriaren aurrean izeneko txostena argitaratu du, Gizarte Langintza eta Gizarte Zerbitzuen Institutuarekin (INTRESS) batera. Halaber, zenbait erakunderen laguntza izan dute; besteak beste, Madrilgo Autonomia Erkidegoko Pertsona Gorren Federazioa (FESORCAM), Galiziako Pertsona Gorren Elkarteen Federazioa (FAXPG) eta Andaluziako Pertsona Gorren Elkarteen Federazioa (FAAS).

Ikerketa-lana ikuspegi kualitatibotik eta kuantitatibotik egin da, Investigación de Acción Participativa (IAP) izeneko prozeduran oinarrituta. Ikerketa-lan horrek hainbat helburu ditu oinarrian, genero-indarkeria jasaten duten edo jasan dezaketen emakume gorren baldintzak erabat hobetze aldera; besteak beste, emakume gorren kontrako genero-indarkerian eragina duten alderdi guztien ikuspegi globalari buruzko txostena egitea; talde horren kontrako genero-indarkeriari buruzko errealitatea erakustea, zabaltzea eta ezagutzera ematea; genero-indarkeriaren harira sortutako baliabide, zerbitzu eta programei buruzko informazioa eta komunikazioa eskuratzeko proposamenak balioestea eta ezartzea; eta, azkenik, esperientziak biltzea eta datuak aztertzea, emakume gorren kontrako genero-indarkeria behar bezala bideratzeko.

Emakume gorrek zailtasun handiak dituzte komunikatzeko eragozpenak direla-eta; horregatik, ikerketa-lan horretan, genero-indarkeriaren aurrean emakume gorren benetako egoera aztertzeaz gainera, emakume horientzat ezarritako baliabide, zerbitzu eta programa publiko zein pribatuen irisgarritasun-maila aztertu, eta jarduera egokiak eta esperientziak bildu dira. Helburua, emakume gorren kontrako tratu txarrei buruzko problematikaren aurrean jokabide eraginkorrerako proposamenak egitea izan da.

Ikerketa bi fase metodologikotan zatitua dago —lehenengoan, gaia zehaztu eta informazioa biltzeko plangintza egin da, FESORCAM, FAXPG eta FAAS elkarteekin batera, proiektuko parte-hartzaileak diren aldetik; bigarrenean, hainbat datu bildu dira; besteak beste, zenbait formatutan jasotako dokumentuak bildu eta aztertu dira, adituei eta eztabaida-taldeei elkarrizketak egin zaizkie, Federazioei eta Elkarteei galdeketak, eta biktimak izan diren emakume gorrak edo genero-indarkeriaren lekukoak elkarrizketatu dira—. Lan-taldeak egindako ikerketa-prozesuaren helburua da desgaitasunen bat duten emakumeak legearen aurrean aintzatestea, indarkeria mota horren aurrean bereziki ahulak diren biztanleak diren aldetik.

Emakume gorrak eta genero-indarkeria
Ikerketa-lanean, entzuteko desgaitasuna duten emakumeen urritasunak azpimarratu dira. Hain zuzen, urritasun horiek are arriskutsuagoak dira indarkeria edo bereizkeria jasaten direnean, tratu txarrak adierazteko zailtasun handiagoak dituztelako, komunikatzeko arazoak direla-eta; informazioa eta zerbitzuak eskuratzeko ere arazo handiagoak izaten dituzte, komunikazio-eragozpenak direla bide; autoestimu baxua; zeinu-mintzairaren interpreteen laguntza behar izatea, entzuten dutenekin komunikatzeko; salaketak aurkezteko beldurra; bakartasuna eta laguntzarik eza; sinesgarritasun gutxiago; tratu txarren aurrean, erasoak jasateko arrisku handiagoa; hezkuntza-maila baxuagoa eta idazteko eta irakurtzeko gaitasun gutxiago; taldea osatzen duten emakumeei buruzko informaziorik eza, indarkeriaren biktimei laguntzeko eta informatzeko zerbitzuetan jarduten duten langileen aldetik…

Pertsona gorren Elkarteek genero-indarkeriaren inguruan egindako funtzioei dagokienez, Emakumearen Batzordeak, CNSren baitan 1994an sortuak, berdintasun-politikak sustatzen eta koordinatzen ditu, Estatuko pertsona gorren elkarteen mugimenduaren inguruan. Era berean, CNSEko Elkarte Mugimenduaren baitan, 2006-2009 Genero Berdintasunerako Ekintza Planak helburutzat genero-indarkeriaren aurkako borroka hartu zuen, besteak beste.

Proposamenak
Lehen aipatutako faseetan bildutako materiala aztertu ondoren, behin betiko dokumentuak hainbat proposamen eta aukera ematen ditu, ikerketa-prozesuan hautemandako urritasunei buruz; proposamen horiek indarkeriaren kontrako ekintza eraginkorra izatea dute helburu, batik bat, bost esparru hauetan: sentsibilizazioa, informazioa, prebentzioa, prestakuntza eta bitartekotza.

Sentsibilizazioari dagokionez, pertsona gorren errealitateari, beharrei eta kezkei buruzko informazioa biltzea zehaztu da (batik bat, emakume gorrenak), bai eta emakume horiek jasaten duten genero-indarkeriari buruzkoa ere. Informazioari buruzko blokean, berriz, eskubideei eta baliabideei buruzko aholkuak ematea da helburua, gorrek erabiltzeko moduko formatuan (esaterako, zeinu-mintzairan). Prebentzioa atalean, hainbat alderdi bildu dira: lehenik eta behin, indarkeria faboratzen duten ereduak gainditzea; bigarrenik, tratu txarrak goiz antzematea eta prebenitzea; eta hirugarrenik, tratu txarrak jasandakoan, ondorioak edo kalteak murriztea, eta ekintza positiborako neurriak sortzea. Halaber, ezinbestekoa da biktimei laguntzeko eta aholkatzeko jarduerei buruzko prestakuntzak eskaintzea, baita genero-indarkeriaren inguruko zeinu-mintzairaren interpreteentzat, indarkeria jasan duten emakume gorrei laguntzeko profesionalentzat eta, oro har, emakume gorrentzat ere. Azkenik, bitartekotzari dagokionez, pertsona gorrei baliabideak errazteko ahaleginak egin dira, hautemateko jardueren bidez, laguntza-zentroetan zeinu-mintzaira eta interpreteak sartuz, telelaguntza-zerbitzua abian jarriz, bitartekotza-baliabideak ezarriz (horretarako, “emakume gorren kontrako indarkeriaren bitartekoa” sortu da, zeinu-mintzairaren eta emakume biktimei laguntzeko, aholkatzeko eta jarraipena egiteko profesionala), emakume biktima gorrei laguntza-zerbitzu integrala berrezarriz, laguntza juridikoa, eta koordinazioa eta zeharkakotasuna aplikatuz.

Agiria ikusteko:
Situación de las mujeres sordas ante la violencia de género – Emakume gorren egoera, genero-indarkeriaren aurrean

Inprimitu

Itxi

Hasierako horrialdera itzuli