Bizkaiko Foru Aldundia - Diputación Foral de Bizkaia

Kataluniako Parlamentuak indarkeria matxista desagerrarazteko emakumeek duten eskubideari buruzko apirilaren 24ko 5/2008 Legea onartu zuen apirilean. Lege horrek, batetik, historian mugimendu feministak sentsibilizazioan eta indarkeriaren aurka egindako lana aintzat hartzen du; eta, bestetik, tratu txarren biktima diren emakumeek legezko testuaren idazketan egin duten ekarpena eta emakumeen elkarteek autonomia erkidegoan egindakoa azpimarratzen ditu.

Indarkeria matxista prebenitzea, antzematea eta desagerraraztea; sexu arrazoiengatik tratu txarrak jasaten dituzten emakumeek prebentzio, laguntza, babes eta sendatze integralari dagokienez dauzkaten eskubideak errespetatzea; eta indarkeria matxistaren alorrean, administrazioen eskumenen zehaztea, antolaketa eta esku-hartze integrala, horiek dira legearen egitura osatzen duten kapituluak. Legeak, halaber, lehenengo kapituluan printzipio gisa ezartzen ditu integralitatea, zeharkakotasuna eta botere publikoek hartutako betebeharra emakumeen funtsezko eskubideen babesle gisa (ez bakarrik laguntza arloko eskubideenak).

Observatorio contra la Violencia Doméstica y de Género deritzonak emakumeen aurkako indarkeriaren arloko epaitegietan erregistratutako salaketen, prozedura penal eta zibilen eta babes-aginduen eskarien kopuruari buruzko estatistika, 2008ko urtarriletik martxora artekoa, argitaratu du.

Erakundeak zabaltzen dituen datuak aztertuta, guztira egon diren 33.950 salaketak aurkezteko bideak polizia-atestatua % 78,2), lesioen partea (% 10,7) eta biktimen beren erabakia (% 10,1) izan dira. Emakumeen aurkako indarkeriaren arloko epaitegietan 5.482 lagun epaitu dituzte. Horien artean, 4.260 lagunek zigortzeko epaia jaso dute, eta gainontzeko 1.222k, absoluzioa. Estatuan eskatutako 9.514 babes-aginduetatik % 71 eman dira, eta Euskal Autonomia Erkidegoan, tramitatutakoen (281) % 58. Justizia auzitegi nagusietan aurkeztutako tasei dagokienez, EAEn 1.007 kasu bideratu dira, beraz, 4,7 salaketa 10.000 biztanleko eta 9,2 salaketa 10.000 emakumeko, eta 125 atzera egite egon dira.

2007. eta 2008. urteetako lehenengo hiruhilekoak alderatuta, aurten ehunekoak gehitu egin dira: 6,8 puntu salaketen kopuruan eta 9,3 onartutako babes-aginduen kopuruan.

Telesailetan proiektatzen den emakumearen irudia aztertzeko, Instituto de la Mujer erakundeak Tratamiento y representación de las mujeres en las teleseries emitidas por las cadenas de televisión de ámbito nacional izenburuko ikerlanari ekin zion.

Generoaren ikuspuntutik, Estatuko eta AEBetako bederatzi telesailen laginetik abiatuta, telesail horietan emakume eta gizonen arteko berdintasunarekiko begirunea ikertu zen mezu adierazi eta subliminalak identifikatuta; ikus-entzunezkoen edukiek emakume eta gizonen ereduen transmisioan duten erantzukizuna eta edukien eta balio sozial eta kulturalen arteko korrespondentzia aztertu ziren; estereotipo eta rol berezituen hedapena, eta sexuen arteko botere oreka edo desoreka familian, bikotean, lagunen artean, lanean, aisialdian…

Lanean, nortzuk daude ardura handieneko lanpostuetan? Nork erakusten du profesionaltasun handiagoa lanean? Nork dauka esperientzia gutxiago? Nor arduratzen da etxeko antolaketaz? Nork kontrolatzen du familiaren aurrekontua? Nork hitz egin ohi du seme-alabekin? Nork egiten ditu erosketak? Nor da jatorragoa? Nortzuk dira taldeetako buruak? Nork jaso ohi ditu isekak eta txantxak? Nork agintzen du bikotearen harremanetan? Argitalpenak, galdera horien guztien erantzuna emateaz gain, komunikabideen gizarteratze-funtzioari eta genero identitateak sortzeko orduan duten eraginari buruzko eztabaida sustatzen laguntzen du-.