Bizkaiko Foru Aldundia - Diputación Foral de Bizkaia

Sonia Durán andreari eta Leire Combo andreari, ARGITAN-CENTRO ASESOR DE LA MUJER elkarteko arreta psikologikorako taldeko kideei, elkarrizketa.

Sonia Durán Carretero Psikologian eta Kriminologian lizentziatua da eta Psikologia klinikoan eta Osasun Psikologian masterra du. Argitan zentroko arreta psikologikorako taldean sartu aurretik, bere jarduera profesionala elikadura-jokabidean asaldurak dituzten pazienteei psikoterapia eskaintzen garatu zuen.
Leire Combo Freire andreak Psikologiako lizentziatura lortu zuen Deustuko unibertsitatean eta Psikopatologia Klinikoko masterra egin zuen Bartzelonako Ramón Llul unibertsitatean, Vidal i Barraquer Fundazioaren eskutik.

Sonia, noiz inauguratu zen ARGITAN-CENTRO ASESOR DE LA MUJER? Zein testuingurutan erabaki zen horrelako zentro bat irekitzea? Nolako zerbitzuak eskaintzen ditu? Zein esparrutan esku hartzen da?

1996ko martxoan hasi zen lanean ARGITAN zentroa. Barakaldoko emakumeek generoarekin erlazionatutako arazoei erantzungo zien zerbitzurik ez zegoela ikusi zuten eta behar horri erantzuteko sortu zen ARGITAN.

Aholkularitza juridikoa-lanekoa, laguntza psikologikoa eta gizarte-aholkularitza dira, funtsean, ARGITANek eskaintzen dituen zerbitzuak. Gainera, hainbat jarduera garatzen dira, generoaren ikuspegitik guztiak, hala nola tailerrak, ikastaroak, hitzaldiak, elkarrizketak…; era berean, generoa dela eta eragindako egoera bidegabe guztiak salatzen dira eta herritarren kontzientziazioa lortzeko lan egiten da.

Zentrora etortzen diren emakume gehienak Barakaldon bizi dira, baina inguruko emakumeak ere etortzen dira (ezkerraldekoak, meategien ingurukoak), Bilbo Handikoak barne hartuta.

Ondorengo taulan ikus daitezke gure funtzionamendua laburbiltzen duten hainbat datu:

Leire, emakumeekin erlazionatutako zein alderdi lantzen edo indartzen dira zentroan?

ARGITANetik desberdintasuna, diskriminazioa edo indarkeria sexista jasaten duten emakumeen beharrei erantzuten saiatzen gara, kasuan kasuko egoera eta ezaugarri guztiak kontuan hartuta.

Sonia, zentroak eskaintzen dituen prestazioak zabaltzeko aukera aztertu al duzue? Antzeko lana egiten duten bestelako elkarteekin harremanik al duzue?

Emakumeen elkarte bat gara eta gure lana funtzio soziala betetzean datza, betiere ikuspegi feminista batetik. Hastapenetan erabaki ziren helburu orokorrak ez ditugu aldatu, hain zuzen ere: erkidegoa genero-arazoen aurrean sentsibilizatzea bilatzen dugu, emakumearen diskriminazioa eragiten duten arrazoiak baztertzen lagunduko duten balio-aldaketa ahalbidetzeko; emakumeen bizi-kalitatea hobetu nahi dugu, informazioa eta aholkularitza soziala, juridikoa, psikologikoa eta sexuala emanez; bi sexuen arteko berdintasuna eta emakumeak bizitza sozioekonomikoan, kulturalean eta politikoan erabat integratzea ahalbidetuko duten baldintzak sustatzen eta indartzen ditugu; edozein motatako diskriminazio salatzeko lan egiten dugu.

Eskualdeko emakumeen elkarte ia guztiekin dugu harremana (ezkerraldekoekin eta meategien ingurukoekin), bai eta gizarte-talde ugarirekin ere.

Leire, zentrora hurbiltzen diren emakumeen artean, zeintzuk dira egiten dituzten kontsulten arrazoi nagusiak?

Gurera hurbiltzeko arrazoi nagusia banantzea/dibortzioa eta horrekin erlazionatutako alderdi oro izaten da: seme-alaben zaintza eta babespea, banantzeak/dibortzioak ekarritako egoera ekonomikoa, mantenu-pentsioak, eta abar. Banantzeari buruzko informazioa eskatzen duten emakume asko tratu txar psikologikoak edota fisikoak jasandako emakumeak izaten dira.

Adierazitako guztiagatik eta Osasun Publikoko Zerbitzuek emakumeen berariazko gizarte-arazoei –tratu txarrak, depresioa, bikoteko arazoak, banantzeko orduan zailtasunak, elikadura-asaldurak…- behar bezalako arreta ematen ez dietelako, urtetik urtera gero eta emakume gehiagok behar dute arreta psikologikoa.

Laneko arazoak direla eta kontsulta ugari egiten zaizkigu halaber. Eta baliabiderik ezaren ondorioz sortutako arazo ekonomikoak gainditzeko gizarte-laguntzei buruzko informazio ugari eskatzen zaigu era berean.

Sonia, azaldu itzazu bikotekideen aldetik tratu txarrak jasaten dituzten emakumeekin ARGITANek garatzen dituen arreta psikologikoko metodoak.

Arreta psikologikorako zerbitzuaren barruan banakako arreta eta taldekoa eskaintzen da.
Kontsulta gehienak depresioa, bikoteko arazoak, tratu txar fisikoak eta psikologikoa, autoestimu baxua, eta abar bezalako arazoekin erlazionatuta egoten dira. Tratu txarrak, bortxaketa, abandonua, eta abar bezalako egoerak bizi izan dituzten emakumeei laguntza eta babes psikologikoa ematen zaie, hartara, emakume horiei bizitako egoera traumatikoak gainditzen laguntzeko. Zenbait kasutan, jarraipen bat egiten da eta, hala badagokio, zerbitzu espezializatuagoetara bideratzen dira pazienteak.

Gaur egun ahalegin handia egiten ari gara taldeko arreta egokia eskaintzeko, izan ere, Autoestimua indartzeko Taldeak sustatzeko eta zabaltzeko erabakia hartu da. Oso garrantzitsua eta beharrezkoa da emakumeentzat talde horietatik egiten den lana. Horrez gain, gurean garatzen ditugun Autodefentsako Tailerrak ere oso garrantzitsuak dira eta emakumeen segurtasuna eta konfiantza, hau da, emakumeen autoestimua azken finean, hobetzeko balio handiko bitartekoa direla azpimarratu behar da.

Leire eta Sonia, indarkeria pairatzen duten emakumeen arreta psikologikoari dagokionez, zaila al da maila emozionalean esku hartzea? Zein alderdiri eskaini behar zaio arreta handiagoa? Zein oztopo gainditu behar dira esku-hartze eraginkorra egiteko?

Garrantzi handikoa da indarkeria jasan duten emakumeek bizitza emozional orekatsua berreskuratzea; hori dela eta, emakumeei euren burua maitatzen eta errespetatzen irakatsi behar zaie, izan ere, indarkeria jasan duten emakumeen kasuan, emozioak nabarmenki kaltetuta eta eraginda egoten dira.

Sonia, nolakoa da zentrora jotzen duten emakumeek erakusten duten jarrera?

Jakin badakite lan handia eta zaila egin behar dutela, baina indartsu ikusten dute euren burua eta lortuko dutelako konfiantza dute.

Leire, nork baztertzen du berdintasunaren legitimitatea? Prebentzioa al da bidea?

ARGITANen arreta pertsonalizatuaren eta taldekoaren bitartez emakumeen ongizate pertsonala eragozten duten eta generoarekin erlazionatuta dauden arrazoi kulturalak eta sozialak aztertzen ditugu. Izan ere, garrantzi handikoa da emakumeak bizi duen arazoa arazo indibiduala ez baizik eta taldekoa dela ohartzea, hau da, arazoaren jatorria gizartean dagoela azpimarratzea eta ulertzea. Horrenbestez, berdintasunezko hezkuntzak, aukera-berdintasuna ziurtatuko duen prestakuntzak eta erabakiak hartzeko botereak berebiziko garrantzia dute generoaren eraginez sortutako desberdintasunen eta diskriminazioaren ondorioz indarkeriarik sortuko ez duen gizarte bat osatzeko bidean.

Sonia eta Leire, kontuan hartuta ARGITANek Bizkaiko Genero Indarkeriaren Behatokian parte hartzen duela, zein balorazio egiten duzue ARGITANek aipatu organismoan egin duen ibilbidearen gainean? Zein ekarpen egin da emakumeek jasaten duten indarkeriaren aurka garatutako borrokan? Zein alderdi indartu beharko lirateke?

Lurraldean gertatzen den genero-indarkeriari buruzko datuak jasotzea eta bateratzea funtsezkoa da emakumeek bizi dituzten egoerak ondo ezagutzeko, gizarteko arazo horrek duen garrantzi handia ulertzeko eta islatzeko eta esku hartzeko modu egokia aztertzeko; era berean, funtsezkoa da herritar guztien eskura jarriko den baliabideen mapa bat lantzeko eta osatzeko.

Indarkeria pairatzen duten emakumeekin dugun harremanak ematen digun esperientzia oinarrian hartu eta arazoaren ikuspegi erreal bat osatzea bilatzen dugu. Xede horrekin, maila orotan esku hartu behar dela uste dugu: informazioa eman, arreta eta babesa eskaini, baliabide ekonomikorik ez duten emakumeei prestazioak eskaini eta, jakina, tratu txarrek eragindako egoera zailei aurre egiteko eta horiek gainditzeko laguntza emozionala eta psikologikoa eman.

Gure ustez, genero-indarkeriari aurre egiteko baliabide eta bitarteko hurbilekoak, ezagunak eta denboran aldatzen ez direnak eskaini behar dira eta, era berean, ondo koordinatu behar dira guztiak, tratu txarrak jasaten dituzten emakumeen bizitza hobetu nahi bada.

Inprimitu

Itxi

Hasierako horrialdera itzuli